Parakhna mat Parakhne mein koi apna nahi rehta

Parakhna mat Parakhne mein koi apna nahi rehta
Kisi bhi Aainey mein dair tak Chehra nahi rehta

Hazaron Shair Mere so gaye Kaghaz ki Qabron mein
Ajab Maa hun koi Baccha Mera Zinda nahi rehta

Bade Logon se Milne mein Hamesha Faasla rakhna
Jahan Dariya Samamdar se mila Dariya nahi rehta

Tumhara Shehar to bilkul Naye Andaaz wala hai
Hamare Shehar mein bhi ab koi Ham saa nahi reht

Koi Baadal Naye Mausam ka phir Elaan karta hai
Khizaan ke Baagh mein jab ek bhi Patta nahi rehta

Mohobbat ek Khushbu hai Hamesha saath rehti hai
Koi Insaan Tanhai mein bhi Tanha nahi rehta

- Bashir Badr